حاکم شێخ لەتیف
پێش هەفتەیەک
حاکم شێخ لەتیف؛ شارەزاو تایبەتمەند لەیاسا، هۆشداری لەبارەی سەرژمێریی گشتی لەکەرکوک و ناوچە جێناکۆکەکانەوە دەدات و پێیوایە لەئێستادا ئەنجامدانی سەرژمێری لەو ناوچانە کارێکی نایاساییەو دەڵێت:
سەرژمێریی گشتی لەناوچە جێناکۆکەکان لەڕووی دەستورییەوە، هەرچەندە لەسایەی گەندەڵی و نادادپەروەری دەسەڵاتەوە باس کردنی مافە نەتەوەیی و نیشتیمانیەکان لە گرنگیدانی زۆربەی خەلکیدا نەماوە بەلام وەک ئەرکیک بە پیویستی دەزانم ئەمە باس بکەم.
هەموومان دەزانین کە چارەنووسی کەرکوک و ناوچە جیناکۆکەکانی تر لەدەستووردا چارەسەر کراون، سەرەتا لەماددەی ٥۸ ی یاسای بەریوەبردنی دەوڵەت بۆ قۆناغی گواستنەوە دوایش ئەو مادەیە بەگویرەی دەستوری عیراق مایەوەو بوە مادەی ۱٤٠ لەدەستوری هەمیشەیی.
بەگوێرەی هەردوو ماددەکە دەبێت لەو ناوچانە ئاساییکردنەوە ڕووبدات، ئاساییکردنەوە بەمانای ناردنەوەی عەرەبە هاوردەکان بۆ جێگەی پێشووی خۆیان یا گواستنەوەی تۆماری نفوسەکانیان بۆ پارێزگاکانی پێشووی خۆیان و گێڕانەوەی کوردە ڕاگوێزراوەکان بۆ ئەو ناوچانە، ئینجا ئیحسا (واتە ئامار بکرێت).
دوای ئەوەی کە ئاسایی بونەوە تەواو بوو تەنها خەلکە رەسەنەکەی ئەو ناوچانە مانەوە ئیتر دەبێت ڕاپرسی بکرێت بۆ ئەوەی چارەنووسی خۆیان دیاریبکەن.
بەگوێرەی بڕگەی کۆتایی مادەی ٥۸ لە یاسای کاتی بەریوەبردنی دەولەت کە تا ئیستا بەگویرەی دەستوری عیراق بەرکارە، نابێت هیچ بڕیارێک بدرێت سەبارەت بەچارەنووسی کۆتایی ئەو ناوچانە یا کاریگەریی هەبێت لەسەر ئەو ناوچانە، تائەو سێ قۆناغەی مادەکە جێبەجێنەکرێن.
بۆیە پێمانوایە ئەنجامدانی سەرژمێری گشتی لەکەرکوک و ناوچە جێ ناکۆکەکان پێش جێبەجیکردنی قۆناغەکانی هەردوو ماددەی ٥۸و ۱٤٠ پێچەوانەی دەستوری عێراقە.
گەر سەرژمێریش بکرێت، دەبێت وەک چۆن لە (یاسای هەڵبژاردنەکانی کەرکوک) باسدەکرا، دەقێک لەپەرلەمان دەربچێت بەڕوون و ئاشکرا بڵێت کە ئەم سەرژمێرییە هیچ کاریگەری بۆسەر یەکلاییکردنەوەی چارەنووسی ناوچە جێناکۆکەکانەوە نابێت و نابێتە بنەما بۆ هیچ بڕیاریک کە چارەنووسی ئەو ناوچانەی پێ یەکلایی دەکریتەوە لەداهاتوودا، هیچ کاریگەریشی نابیت بۆ قۆناغەکانی جێبەجێکردنی هەردوو ماددەکە.
