Plus4
berî 1 meh
ئاگادارییەکی گرنگ لەهاتووچۆی کەرکوکەوە بۆ شۆفێران
بەڕێوەبەرایەتیی هاتووچۆی کەرکوک، ئاگاداری هاووڵاتیان و شۆفێرانی کەرکوک دەکات کە چەند ڕێگەیەکی سەرەکیی نێو شارەکەو دەوروبەری دادەخرێن و ڕێگەی جێگرەوەیان بۆ دەستنیشانکراوە، بەمشێوەیە:
لەکاتژمێر ڕێگەی دەروازە، 9:00ی ئەمشەوەوە تا 5:00ی بەرەبەیانی سبەی، ئەو ڕێگەیەی لەبەرێوەبەرایەتیی هاتووچۆی کەرکوکەوە بەرەو گەڕەکی دەروازە دێت، بەتەواوی دادەخرێت، بەهۆی کاری هێڵکاریی تێیداو ئەو ڕێگەیەی و بەئاراستەی گاردن سیتی دەچێت، دەکرێت بەڕێگەی جێگرەوە بۆی.
دووەم: شەقامی کەرکوک - تکریت، ڕێگەی نزیک پردی زغیتۆن، بەهۆی داخستن و پچڕان لەبەشێکی ڕێگەکەو قیرتاوکردن و چاککردنەوە بۆ چارەسەرکردنی ئەو چاڵانەی کە هەن لەسەر ڕێگەکە، دادەخرێت.
سێیەم: ئەو ڕێگەیەی بەئاراستەی ڕۆژئاوا بەرەو فولکەی گەراجی بەغدا دەڕوات، دادەخرێت و لادانێکی کاتی لەشوێنیدا بۆ بەردەوامبوونی هاتووچۆ. دەکرێتەوە، هۆکارەکەشی بۆ دروستکردنی ئەندەرپاس لەنێو فولکەی گەراجی بەغدا دەگەڕێتەوە.
چوارەم: ڕێگەی بەغدا - کەرکوک (پردی گەورەی داقووق)، ئەو ڕێگەیەی لەبەغداوە بەرەو کەرکوک دێت دادەخرێت و لادانێک بۆ هاتووچۆ لەدیوێکی تری پردەکە دروستدەکرێت، بەهۆی نوژەنکردنەوەی پردەکە.
پێنجەم: ڕێگەی هەولێر - کەرکوک (بازگەی هاوبەشی پردێ)، هاتووچۆ لەپارێزگای هەولێرەوە بەرەو پارێزگای کەرکوک دادەخرێت و لادانێکی کاتی لەبری ئەو دەکرێتەوە، هۆکارەکەیشی نۆژەنکردنەوەی شوێنی بازگەکەیە.
شەشەم: قەزای حەویجە، ئەو ڕێگەیەی لەبازگەی پەیمانگەی تەکنیکیی حەویجەوە بەرەو بازگەی دووبز درێژ دەبێتەوە دادەخرێت لادانێک بۆ دیوەکەی تری ڕێگەکە دەکرێتەوە، ئەویش بەهۆی دانانی تۆڕی ئاوەڕۆ لەنێو قەزاکە.
بۆ ئەو مەبەستە، هاتووچۆی کەرکوک داوا لەسەرجەم شۆفێران دەکات پابەندی ڕێساکانی هاتووچۆ بن، ڕەچاوی سنووری خێرایی بکەن بۆ پاراستنی سەلامەتیی گیانی خۆیان.
