plus4
پێش ٢ ساڵ
زەكەریا و سومەییە لەسەردەمی كۆڕۆنا بەرێككەوت یەكتر دەناسن و پەیوەندی خۆشەویستی دەكەوێتە نێوانیان، لەو كاتەوە دەرگای كێشە و هەڕەشەین لێدەكرێتەوە تەنانەت سوڵحی عەشایەریش نەیتوانی ژیانیان بپارێزێت
بەیانی ئەمڕۆ، جارێكیتر كارەساتێكی دڵتەزێن شاری هەولێری هەژاند، ئەویش كوشتنی دوو هاوسەری گەنج لەنێو ماڵەكەی خۆیان.
روداوەكە لەگەڕەكی سەڵاحەدین - شەقامی سورچیان رویداوە.
بەڕێوەبەرایەتی پۆلیسی هەولێر لەرونكردنەوەیەكدا ئاماژە بۆ ئەوەدەكات " دوو كەس بەناوەكانی زەكەریا و سومەییە لەروداوەكەدا كوژراون، دوای لێكۆڵینەوە دەركەوتووە بكوژ برای (سومەییە)یە و هۆكارەكەش خێزانیە ."
زەكەریا تەمەنی 22 ساڵ و سومەییەش تەمەنی 17ساڵ بوە.
بەپێی زانیارییەكانی plus4 لەكاتی سەرهەڵدانی كۆڕۆناو كەرەنتینەی هاوڵاتیان، زەكەریا و سومەییە لەنەخۆشخانەی ئیماراتی لەهەولێر یەكتر دەناسن و پەویەندی خۆشەویستی لەگەڵ یەكتر دروستدەكەن، دوای ساڵێك ئاشكرادەبن.
دوای ئاشكرابونی خۆشەویستیەكەیان، بەسوڵحی عەشایەری كێشەكە چارەسەر دەبێت، بەمەرجی مارەكردنی كچەكە و پێدانی سێ كچ لەبەرانبەردا.
دوای هاوسەرگیری سومەییە و زەكەریا، ماڵی زەكەریا دوو كچیان بەماڵی سومەییە داوە و بڕیاریشبوە بەم نزیكانە كچی سێیەم بگوازرێتەوە.
خاڵی زەكەریا دەڵێت "كوڕەكە و كچەكە یەكتریان خۆشدەویست و هاوسەرگیرییان كرد، بەڵام هاوسەرگیرییەكەیان لای ماڵی باوكی كچەكە قبوڵكراو نەبوو، بۆ چارەسەركردنی كێشەكەش سێ ژنماندایە ئەو ماڵە ."
دەشڵێت " وادیاربوو ئەوەی كرابوو سودی نەبوو، ئەمڕۆ كوڕێكی ماڵەكە هاتووەتە سەر ماڵی خوشكەزاكەم و هەردووكیان كوشتووە."
زەكەریا و سومەییە بۆ ئەوەی لەكەسوكاری كچەكە دوركەونەوە، خانویەكیان لەگەڕەكی دوری ئەوانیش بەكرێ گرتبوو.
بكوژەكە، یەكێكە لەبراكانی سومەییە كە لەبری خوشكەكەی، خوشكێكی زەكەریای پێدراوە و هاوسەرێتی.
