plus4
پێش هەفتەیەک
سەرچاوەیەك لەوەزارەتی دارایی هەرێم ڕایگەیاند: لەئێستادا لەبەغدا مووچەی چەند دەستەو وەزارەتێكی خەرج نەكردووە، نەبوونی پارەی نەختینەش هۆكاری دواكەوتنی مووچەیە.
هۆكاری دواكەوتنی واژۆی لیستی مووچەی هەرێمیش لەلایەن تەیف سامی یەوە، هەر پەیوەندیی بەكەمیی پارەی كاش هەیەو بڕیاردراوە بەزووترین كات و پێش جەژن ئەو كێشەیە چارەسەربكرێت و مووچەی هەرێمی كوردستان خەرجبكرێت.
بەڵام لقی هەولێری بانكی ناوەندیی عێراق ڕەتیدەكاتەوە كێشەی پارەی كاش هەبێت بۆ دابەشكردنی مووچەو دەڵێت: هەركات فەرمانی خەرجكردنی مووچەی مانگی سێ درا، پارەی تەواومان لەبەردەستدایەو ڕاستەوخۆ دەست بەخەرجكردنی دەكەین.
ڕاشیدەگەیەنێت: هیچ مانگێك پارەی كاش لەبەغداوە بۆ مووچە بۆ هەرێمی كوردستان نانێردرێت كە مانگانە بڕەكەی 950 بۆ 960 ملیار دینارە، بەڵكو لقی هەولێری بانكی ناوەندیی عێراق خۆی دەوڵەمەندەو بەردەوام پارەیەكی زۆری لەبەردەستدایە، مانگانە لەبەغداوە تەنها نووسراوی خەرجكردنی پارەی مووچە (ئەشعار بانكی) بۆ بانكەكە دەنێردرێت.
دەشڵێت: ئێستا زیاتر لەیەك تریلیۆن دینار لەبانك ئامادەیە، هەركات نووسراوی خەرجكردنی پارەمان بەدەست بگات خەرجیدەكەین و پارە بەسەر بانكەكان دابەشدەكەین.
سەرچاوەیەكیش لەوەفدی تەكنیكی وەزارەتی دارایی هەرێم ڕایگەیاند: تەیف سامی واژۆی لەسەر وردبینیی لیستی مووچەی مانگی سێی مووچەخۆرانی هەرێمی كردووە، تەنها ماوە واژۆ لەسەر تەمویلكردنی پارەی مووچە بكرێت و پارەكە ڕەوانەی هەرێم بكرێت، هەركاتیش پارەكە گەیشتە هەرێم، لیستی مووچە ئامادەكراوەو ڕاستەوخۆ بڵاودەكرێتەوەو ڕۆژی دواتر دەست بەدابەشكردنی دەكرێت، بڕیارە ئەمڕۆ بڕیاری تەمویلكردنی پارەی مووچە بدرێت و پێش جەژنیش مووچە دابەشبكرێت، تەیف سامیش وتوویەتی: دوای مووچەخۆرانی عێراق مووچە بۆ هەرێم دەنێرم و بەر لەجەژن مووچەخۆرانی هەرێمیش مووچە وەردەگرن.
