plus4
پێش ٢ ساڵ
پڕۆژەی ئه‌نتەرنێتی نشتیمانی لەكەركوك دەستی بەكاركردن كرد و یەكەم هێڵی كێبڵی تیشكیش گەیەندرایە ماڵێك لەگەڕەكی غەرناتەی شارەكە.
سێ پڕۆژەی خزمەتگوزاریی ئەنتەرنێت لەكەركوك دەستیان بەكاركردن كردووە، بریتین لە " پڕۆژەی نشتیمانی، تۆڕی نشتیمانی و adsl " كە هێلەكانیان لەرێگەی كێبڵی تیشكیەوە دەگەیەننە ماڵان.
تۆڕی نشتیمانی یەكێكە لەپڕۆژەكان و ماوەی چوار مانگە هێڵ دابەشدەكات، بڕیارە لەساڵی یەكەمدا هێڵی ئەنتەرنێت بگەیەنێتە 10 هەزار بەشداربوو، بەڵام بەپێی ئامارێكی دەستەی پەیوەندیەكانی كەركوك تەنها لە چوار مانگدا چوار هەزار هێڵی لەگەڕەكەكانی ( عەسكەری، راپەڕینی یەك، راپەڕینی دوو و دەورەبەری ) دابەشكردووە.
گەڕەكی غەرناتە وەك یەكەم گەڕەك كاری راكێشانی هێڵەكانی تێدا بەتەواوەتی تەواوبوە، روناكیش وەك دووەم گەڕەك خزمەتگوزاریەكەی پێدەگات.
هەرچی پڕۆژەی نشتیمانیە كە ئەمڕۆ یەكەم هێڵی ئەنتەرنێتی گەیاندە ماڵێك لەگەڕەكی غەرناتە، بەهەمان شێوە ماوەیەكی دیاریكراو بۆ تەواوكردنی كارەكانی دیاریكراوە بەڵام بەهۆی نەبونی ژێرخانی خزمەتگوزاریی ئەنتەرنێت، پڕۆژەكە لەوادەی خۆی دواكەوتووە و لەئێستادا تەنها ستۆنەكان ماوەن بگەنە گەرەكەكان.
ئەندازیار محەمەد قەیس بەڕێوەبەری پەیوەندیەكان و زانیاریەكانی كەركوك لەلێدوانێكی تایبەتدا بە PLUS4ی راگەیاند: پڕۆژەی گەیاندنی هێڵی ئەنتەرنێتی كێبڵی تیشكی بە ماڵان لەروی خێرایی و كوالێتیشەوە لەهێڵەكانی دیكە بەهێزتر دەبێت.
وتیشی، نرخی ئەنتەرنێتی كێبڵی تیشكی بەشێوەیەكە كە 40 مێگا بە 45هەزار، 75 مێگا بە 65 و 120 مێگاش بە 100 هەزار دینار دەداتە هاوڵاتیان.
بەوتەی ئەو بەرپرسە حكومیە، ئەوەی ئێستا هێڵی تاوەرەكانی كەركوك بە نرخی 35 هەزار دینار بەماڵانی دەدات تەنها یەك مێگا یاخود مێگا و نیوێكە.
