plus4
پێش 7 مانگ
درەنگانی شەوی رابردوو دوو سەرنشینی ماتۆرسکیلێک گەیەندرانە نەخۆشخانەی داقوق گوایە لەدەوروبەری گوندی یەنگیجەی تاڶەبانی بەر دەستڕێژی گولەی کەسانی نەناسراو کەوتوون و هەردووکیان بریندارببون، روداوەکە بوە جێی دڶەڕاوکێی خەڵکی ناوچەکەو هەر زوو هێزە سەربازییەکان چەند رێوشوێنێکان گرتەبەر.
پۆلیس و هەواڵگری قەزاکە دوای لێکۆڵینەوەو بەدواداچون بۆیان دەرکەوت دانیشتوویەکی دیکەی گوندی یەنگیجە بێ سەروشوێنە.
بەپێی ئەو زانیاریانەی دەستی ئاژانسی هەواڵی plus4 کەوتووە، هێزە ئەمنییەکان لەروداوەکە بەگومان بونەو بەوردی لێکۆڵینەوە و گەڕانیان کردووەو هەندێ سەرەداویان دەستکەوتووەو بەهەماهەنگی لەگەڵ دەزگایەکی ئەمنی سلێمانی توانیویانە کەسێک دەستگیربکرێت.
هەر بەپێی ئەو زانیاریانە، دەستگیرکراوەکە دانی بەوەداناوە کە شەوی رابردوو لەدەوروبەری گوندی یەنگیجە لەگەل ژمارەیەک کەسی تردا بەشداربووە لەتاوانی کوشتنێک و تەرمەکەیان لەژێر خۆڵ شاردووەتەوە، مەبەستی ئەو کەسە بوە کە بێ سەروشوێنە.
بڕیارە لەچەند کاتژمێری داهاتوودا پۆلیس و بەڵگەی تاوان و هەواڵگری ئەو شوێنە هەڵبدەنەوەو تەرمەکە دەربهێنن.
ئاژانسی هەواڵی plus4 بۆ سەڵامەتی رێوشوێنی لێکۆڵینەوەکان وردەکاری و زانیاریی زیاتر ناخاتەڕوو و ئەوەشی بڵاودەکرێتەوە تەنها زانیاری سەرەتایین.
