plus4
پێش 7 مانگ
لەدوێنێوە وەفدێکى هەرێم بۆ گفتوگۆکردن لەبارەی پرۆژەی (هەژماری من) لەبەغدایەو ئامانجی سەرەكیی سەردانەکەیان پرۆسەی بەبانكیكردنی مووچەی فەرمانبەرانی هەرێمە لەڕێگەی هەژمای منەوە.
سەرچاوەیەک لەوەزارەتى دارایى هەرێم ڕایگەیاند: بۆ پەسەندکردن و خەرجکردنى لیستى مووچەى پێشمەرگە و هێزەکانى ناوخۆ وەزارەتى دارایی عێراق، مەرجى هەیەو دەڵێت، پێویستە دیوانى چاودێریى دارایی هەرێم لیستەکە واژۆ بکات.
وتیشی: وەزارەتى دارایی عێراق، بەوەفدی هەرێمى وتووە، لیستى مووچەى پێشمەرگەو هێزەکانى پۆلیسى ناوخۆ پەسەند دەکەن، بەو مەرجەى لیستەکە لەلایەن دەستەى دیوانى چاودێریى دارایی هەرێمەوە پەسەندبکرێت و بنێردرێت بۆ وەزارەتى دارایی عێراق.
ئەندامانی وەفدەکەی هەرێم دەسەڵاتى ئەوەیان پێنەدراوە لەسەر مووچەى فەرمانبەرانى هەرێم گفتوگۆ بکەن، جگە لەپێدانى ڕوونکردنەوە بە بەغداد لەسەر پرۆژەی (هەژماری من) و لیستى مووچەى پێشمەرگەو هێزە ئەمنییەکان.
سەرچاوەکە ئاشکرایدەکات کە هەرێم هەوڵەكانی دەستپێكردووە تا پرۆسەی بەبانكیكردنەکە لەلایەن بانكەكانی عێراقەوە جێبەجێنەكرێت و عێراقیش ڕێگە نادات بەبانکی کردنە لەڕێگەی (هەژماری من)ەوە بێت و دەبێت لەڕێگەی یەکێێک لەبانکەکانی عێراقەوە بکرێت.
