ئەو چەكدارەی عەلی فرێجی دەستگیریكرد دەركەوتەوە، دەڵێت " سیناریۆ بوە "

مستەفا ئەو چەكدارەی حەشدی شەعبیە، بەهۆی بڵاوبونەوەی ڤیدیۆیەكی كە بەدەمانچەوە دەچێتە سەر ماڵێك.. عەلی فرێجی بڕیاریدا ده‌ستگیربكرێت و دواتر ڤیدۆییەكی بڵاوكردەوە و ناوبراوی بەدەستگیركراوی نیشاندا و  وتی " كە دەڵێم دەستگیرت دەكەم بچیتە ئاسمانیش هەر دەستگیرت دەكەم ".

مستەفا راغب لەگرتەیەكی ڤیدۆییدا ئەوە دەخاتەڕوو كە هێزێكی ئۆپراسیۆنەكان هاتوونەتە بنكەی پۆلیسی قۆریە و بردویانە بۆ بارەگاكەی عەلی فرێجی و وێنەیان گرتووە و لەهەر جارێكدا وەڵامی دابێته‌وه‌، سیناریۆیی وێنە گرتنەكەیان دووبارە كردووه‌ته‌وه‌.

ئەو ئاماژە بۆ ئەوە دەكات كە فەرماندە سه‌ربازیه‌كه‌ی كه‌ركوك ئیهانەی كردووە و ئەوەش بەپێی هیچ پێوەرێك قبوڵكراو نیە.. دەشڵێت " چوار جار لەسەنگەرەكانی شەڕی داعش برینداربومە و دوو جاریش لەناو كەركوك هەوڵی تیرۆركردنم دراوە ."

بەوتەی خۆی، لە دادگا بێ تاوانی سەلماندووە، ئێستا بەتۆمەتی درۆ و ناو زڕاندن، سکاڵای دژی خێزانەکە کردووەو فەرمانی دەستگیرکردنیان بۆ دەرچووە.