PLUS4
پێش ساڵێک
فەلاح حەسەن گەنجێكی عێراقییە، لەپێناو دابینكردنی بژێوی ژیانیدا دەستی داوەتە مەترسیدارترین پیشە و سەركێشی بە ژیانی خۆیەوە دەكات.
ماڵپەڕی (insider) لەراپۆرتێكدا باسی گەنجێكی عێراقی دەكات، سەرەڕای هەموو ئەو مەترسیانەی روبەڕوی دەبێتەوە بەڵام سەرقاڵی پوچەڵكردنەوەی مین و بۆمبە چێندراوەكانە و لەبەرانبەریشدا پاداشت دەكرێت.
حەسەن پیشە سەركێشییەكەی لە مامۆستایی پێباشترە، چونكە دەڵێت مامۆستا ساڵێك دەبێت چاوەڕێی ئەنجامی ماندووبونەكەی بكات، بەڵام من لەگەڵ پوچەڵكردنەوەی هەر بۆمبێكدا، ئەنجامەكەی دەبینم.
دەشڵێت، لێرە هەلی دووبارەبونەوەی هەڵە نییە، چونكە یەكەم هەڵە دەبێتە هۆی گیان لەدەستدانت".
راپۆرتەكە ئاماژە بۆ ئەوەدەكات، حەسەن مانگانە هەزارو 700 دۆلار وەردەگرێت بەرانبەر دۆزینەوەو پوچەڵكردنەوەی بۆمبە چێندراوەكانی سەردەمی د11عش.
گروپی تیرۆرستی د11عش لەساڵی 2014 بۆ ماوەی سێ ساڵ دەستی بەسەر 40%ی خاكی عێراقدا گرتبوو، لەو ماوەیەدا هەموو ئەو ناوچانەی بە بۆمبی چێندراو تەنیوە.
بەوتەی حەسەن، بۆمبەكات بە سێ رێگا دەتەقنەوە، رێگەی یەكەم، لەرێی كۆنتڕۆڵەوە، رێگەی دووەم بەستنەوەی بە تەل یاخود مۆبایلەوە، رێگەی سێیەمیش لەرێی قوربانییەكان خۆیانەوە دەبێت كە پێیان بەری دەكەوێت".
بۆمبەكانی د11عش زۆرینەیان دروستكراوی ناوخۆیی كە پێكهاتەكەی بریتییە لە ساعیقە و پاتری و تەختەی روپێوی فشار كە وەك كلیلی تەقینەوەكە كار دەكات.
فەلاح حەسەن رایدەگەیەنێت، بۆمب و تەقەمەنی لە 3هەزارو 200 كیلۆمەتر زەوی عێراقدا هەیە كە دوو هێندەی رووبەری شاری لەندەنە.
ماڵپەڕی (insider) ئاشكرایدەكات، هەشت ملیۆن و 500 هەزار كەس لەنێو پاشماوە جەنگییەكاندا ژیان بەسەر دەبەن و مەترسی كوشندە لەسەر ژیانیان هەیە.
- سەرچاوە/ insider
- وەرگێڕان بۆ كوردی/ plus4
