plus4
پێش ٢ ڕۆژ
بەڕێوەبەرایەتیی گشتیی هاتووچۆی عێراق، چەندین ڕێنمایی نوێی سەبارەت بەو ماتۆڕسکیلانە دەرکرد کە هێشتا تۆمارنەکراون.
بۆ ئەو مەبەستە ماوەی سێ مانگ مۆڵەتی پێداون تا لەو ماوەیەدا ماتۆڕسکیلەکانیان تۆماربکەن و وەک هاوکارییەک دەستیان بەسەردا ناگیرێت.
لەوبارەیەوە لەنووسراوێکی فەرمیدا عودەی سەمیر؛ بەڕێوەبەری گشتیی هاتووچۆی عێراق ڕایگەیاند: پابەندبوون بەیاساو ڕێساکانی هاتووچۆو لێنەخوڕین بەئاراستەی هەڵەو بەکارنەهێنانی لای چەپی ڕێگەکان واتا ڕێگەی خێراو هەڵنەگرتنی زیاتر لەکەسێک وەک سەرنشین و بەستنی کڵاوی سەلامەتی، مەرج و رێنمایی سەرەکیمانن بۆ شۆفێری ماتۆڕسکیلەکان.
ئاماژەی بۆ ئەوەشکرد: ئەو ماتۆڕسکیلانەی بەشێوەیەکی یاسایی هاتوونەتە نێو عێراق و لەخاڵی گومرگی تۆمارکراون، دوای ئەوەی ئەو مەرجانەی لەیاسای هاتووچۆدا هاتوون، پێش دەرکردنی بڕیاری ژمارە (23484)ی ئەنجومەنی وەزیران لە 2023، کە قەدەغەکردنی هاوردەکردنی ماتۆڕسکیل لەخۆدەگرێت، تۆماردەکرێن.
ئەو ماتۆڕسکیلانەش کە تۆمارنەکراون و کاغەزی تۆماریان نییە، بۆیان نییە لەسەر ڕێگە سەرەکییەکان یان لەنێو سەنتەری شاردا لێبخووڕن، بەپێچەوانەوە گەر لەلایەن پۆلیسی هاتووچۆوە بەدی بکرێن، ئەوا ڕاستەوخۆ دەستیان بەسەردا دەگیرێت.
نووسراوەکە، چەندین مەرج و ڕێنمایی تێدا هاتووە کە بریتین لە:
1- هیچ ماتۆڕسکیلێک ڕێگەی پێنادرێت زیاد لەسەرنشینێکی لەسەر بێت.
2- پێویستە شۆفێر کڵاوی سەلامەتی لەسەر بکات.
3- تەنها لای ڕاستی ڕێگەکان، شوێنی لێخوڕینی ماتۆڕسکیلەکانە.
4- هاتووچۆی ماتۆڕسکیل لەکاتژمێر 1ی بەرەبەیان تا 5ی بەیانی قەدەغەیە.
5- هیچ شۆفێرێک بێ بوونی مۆڵەت، مافی لێخوڕینی ماتۆڕسکیلی نییە.
