Plus4
پێش هەفتەیەک
بەبڕیاری دۆناڵد ترەمپ، سەرۆكی ئەمریكاوە، دەنگی كوردی ئەمریكا دادەخرێت و لیژنەی داكۆكی لەئازادیی ڕۆژنامەنووسی و مافی ڕۆژنامەنووسانیش ئیدانەی ئەو كارە دەكات.
لیژنەی داكۆكی لە ئازادیی رۆژنامەنووسی و مافی ڕۆژنامەنووسانی هەرێمیش لەڕاگەیاندراوێكدا دەڵێت: لەكاتێكدا دەنگی كوردی ئەمریكا وەك كەناڵێكی نیمچە ئازاد لەم هەرێمەدا كاری دەكردو ستاف و پەیامنێریان هەبوو، هاوكات میدیایەك بوو كە بەزمانی كوردی پەخش و پەیامی هەبوو بۆ كوردانی ناوچەكانی تریش بەداخەوە داخران.
بەپێی ڕاگەیاندراوەكە: كەناڵەكانی الحرە و الحرە عراق ڕادیۆ سەواش داخران و پرۆسەی هاوكاریی چەندین دەزگاو میدیاش لەناوچەكە ڕاگیران، دەشڵێت: ئێمە لەكاتێكدا نیگەرانیی خۆمان بۆ ئەم هەنگاوانە دەردەبڕین، هیوادارین پێداچوونەوە بەبڕیاری داخستنی میدیاكاندا بكرێتەوە، بەتایبەت دەنگی كوردیی ئەمریكا، لەم سەروبەنداشدا بژێوی ژیانی ئەو تیمانەی كاریان بۆ كردووە بەهەند وەربگیرێت.
ئەمە لەكاتێكدایە، هەر لەدوای ئەو بڕیارەی ترەمپەوە لە 15ی 3ی 2025وە، هیچ بابەتێك لەسایت و سەكۆكانی سۆشیال میدیای دەنگی ئەمریكاوە بڵاونەبووتەوە.
دنگی كوردیی ئەمریكا لەڕۆژی ٢٥ی نیسانی ساڵی ١٩٩٢ دامەزراوەو لەسەرەتادا بەشی كوردی ٥ كارمەندی هەبووەو سەرەتاش بەرنامەكانی بەشی كوردی تەنها ١٥ خولەك بوو، پاشان بوون بە ٣٠ خولەك و ژمارەی كارمەندەكانیش بوون بە ٩ كەس.
دواتر ماوەی بەرنامەكان بۆ چوار كاتژمێر درێژكرایەوەو ژمارەی كارمەندانیش بوون بە ٢٢ كەس، لە ٢٠٠٧ ژمارەی كارمەندان بوون بە ٢٧ كەس و لەساڵی ٢٠١٠ بووەوە ٢٢ كەس.
