ئاژانسی هەواڵی plus4
پێش مانگێک
پاش زۆربوونی کێشەبەردەوامەکانی کۆمپانیای کۆڕەک تیلیکۆم و کەڵەکەبوونی قەرزەکانی، لەڕاگەیاندراوێکدا دەستەی ڕاگەیاندن و پەیوەندییەکانی عێراق دەستبەجێ هێڵی کۆڕەک تیلیکۆم ڕابگیرێت تا ئەوکاتەی کۆمپانیاکە تەواوی قەرزەکانی دەداتەوە.
لەئێستاشدا لەتەواوی پارێزگاکانی عێراق، هێڵی کۆڕەک تیلیکۆم وەستاوەو ناتواندرێت پەیوەندیی تەلەفۆنیی پێ ئەنجامبدرێت و خزمەتگوزاریی ئینتەرنێتیشی لەکارخراوە.
ئەم بڕیارە لەدرەنگانی شەوی ڕابردووەوە لە 15 پارێزگای عێراقدا جێبەجێ کراوە، جگە لەهەرێمی کوردستان، ئەویش تەنها لەنێوخۆی تۆڕەکەدا دەتوانرێت پەیوەندی بکرێت.
دەستەی ڕاگەیاندن و پەیوەندییەکانی عێراق رایگەیاند، تاوەکو رۆژی چوارشەممەی داهاتوو مۆڵەت بە کۆڕەک تیلیکۆم دەدرێت تا قەرزەکانی بداتەوە.
دەستەکە دەڵێت: لەکۆبوونەوەی دوێنێماندا، ڕێکارە یاساییەکانی پەیوەست بەکۆمپانیای کۆڕەک تیلیکۆم و قەرزە کەڵەکەبووەکانی سەری تاوتوێکران، ڕۆژی چوارشەممەی داهاتووش وەک دوا مۆڵەت بۆ چارەسەرکردنی ئەم پرسە دیاریکراوەو دوای ئەو وادەیە مۆڵەتی کۆمپانیاکە بۆ دانەوەی قەرزەکانی درێژناکرێتەوە.
سیروان بارزانی؛ خاوەنی کۆمپانیای کۆڕەک تیلیکۆم لەوبارەیەوە دەڵێت: ئەم بڕیارە هیچ پەیوەندییەکی بەقەرزەکانی سەرمانەوە نییە، بەڵکو بڕیارێکی سیاسییەو هیچیتر.
