plus4
پێش مانگێک
محەمەد شیاع سودانی؛ سەرۆک وەزیرانی عێراق، سەبارەت بەڕێگریکردنی سوپای عێراق لەجوتیارانی کورد هاتەدەنگ و پاش ناردنی وەفدێک بۆ کەرکوک، داوای پێکهێنانی لیژنەیەکی باڵا دەکات.
لەوبارەیەوە فەرماندەیی ئۆپەراسیۆنە هاوبەشەکانی عێراق ڕایگەیاند: دوای ڕێگریکردنەکەی دوێنێی سوپای عێراق لەجوتیارانی کورد لەسنووری سەرگەڕانی کەرکوک، سودانی بڕیارێکی دەرکرد.
وتیشی: سەرۆک وەزیران بەدواداچوونی بۆ بارودۆخی ئەو ڕووداوە کردووە کە دوێنێ لەسنووری کەرکوک ڕوویدا بەڕێگریکردن لەجوتیاران بۆ ئەنجامدانی کارەکانیان.
ئاشکراشیکرد: بۆ ئەو مەبەستە سودانی؛ فەرماندەیی ئۆپەراسیۆنە هاوبەشەکانی ڕاسپارد بۆ پێکهێنانی لیژنەیەکی باڵای لێکۆڵینەوە بۆ لێکۆڵینەوەو بەدواداچوونی ئەو ڕووداوە، تا لەڕووی سەربازییەوە ڕێوشوێنی پێویست بگیرێتە بەرو ڕێگریکاران بەتووندی سزابدرێن.
هاوکات سودانی داوای لەهێزەکانی سوپای عێراق، ناوخۆ، پێشمەرگە، هێزەکانی کۆکردنەوەی جەماوەری، دەزگا ئەمنییەکان و هەواڵگرییەکان کردووە، پابەندی یاساو ڕێنماییەکان بن و ژیرانەو نیشتمانپەروەرانە مامەڵەبکەن، پێویستیشە هەمووان ئەولەویەت بدەن بە بەرژەوەندییە نەتەوەییەکان و پابەندبن بەیاساو دەستوور.
