plus4
پێش ٢ ساڵ
كاتژمێر 12:30ی شەوی 23-24ی نیسان، نزیك گەراجی بەغدا لەسەنتەری شاری كەركوك بەدوری 100 مەتر لەدەوریەیەكی پۆلیسی فریاكەوتن, كچێك هەوڵدەدات خۆی بكوژێت.
لەلایەن پۆلیسەكانەوە رێگری لەهەوڵەكەی دەكرێت و دواتر رادەستی بنكەی پۆلیسی تسعین دەكرێت تاوەكو لێكۆڵینەوە لەهۆكارەكەی بكەن... چیرۆكەكە لێرەوە دەستپێدەكات.
( فاتیمە ) ناوی خوازراوی كچەكەیە و لەدایكبوی ساڵی 2003یە و خوێندكاری لەپارێزگای مەیسان ( عمارە )ی باشوری عێراق.
چەند مانگێكە لەتۆڕە كۆمەڵایەتیەكان لەگەڵ كوڕێكی كەركوكی هاوتەمەنی خۆیدا پەیوەندی خۆشەویستی لەنێوان دروستبووە.
فاتیمە دوێنێ پارێزگای مەیساني بەرەو كەركوك بەجێهێشتووە و لەبەردەم پۆلیس وتوێتی " لەپێناو گەیشتن بەخۆشەویستەكەم خێزانەكەم بەجێهێشتووە و هەڵاتووم ."
بەڵام كاتێك دەگاتە كەركوك، محەمەدی خۆشەویستی لەهەموو بەڵێنەكانی پێشوتر پاشگەزدەبێتەوە كە بە كچە مەیسانیەكەی دابوو.
محەمەد ناوی خوازراوی ئەو گەنجەیە كە پەیوەندی خۆشەویستی لەگەڵ فاتیمە هەبوو، تەمەنی 19 ساڵانە و هێشتا خوێندكاری دواناوەندیە.
ئەفسەرێكی بنكەی پۆلیسی تسعین نەیویست ناوی بڵاوبكرێتەوە لەبارەی كچەكەوە بە plus4ی وت " كچەكە لەپێناو كوڕە خۆشەویستەكەیدا لەماڵ هەڵاتووە، كاتێك بێ بەڵێنی كوڕەكەی دیوە پێی وابوە جگە لەخۆكوشتن هیچ چارەسەرێكی دیكەی لەبەردەمدا نیە ."
وتیشی، سەرەتا كە هێنرایە بنكەی پۆلیس لەدۆخێكی دەرونی خراپدابوو بەڵام دوای قسەكردن لەگەڵیدا و ئاگاداركردنەوەی كەسوكارەكەی باشتربوو.
لەماوەی ئەم مانگەدا ئەمە دووەم حالەتی هەوڵدانە بۆ خۆکوشتن كە هەردوو حاڵەتەكەش هاوشێوەی یەكتر پەیوەندی بەخۆشەویستیەوە هەبوو.
پێشتریش کچێک ویستی لەسەر مۆڵێکی گەڕەکی ئەسراومەفقودین خۆی بخاتە خوارەوە بەڵام پۆلیسی بنکەی پۆلیسی دۆمیز ریگریان کردو دواتر دەرکەوت هۆکارەکەی باوکێتی کە رازی نەبوە بیداتە خۆشەویستەکەی.. فەرماندەی پۆلیس راستەوخۆ چوە بابەتەکەوەو قەناعەتی بەهەردولا کرد هاوسەرگیری بکەن و کچ و کوڕەکەی بەیەکتر گەیاند.
کەرکوک لەریزبەندی یەکەمی ئەو شارانەیە کە زۆرترین حاڵەتی خۆکوشتن تێیدا سالانە تۆماردەکرێت.
- تێبینی/ فاتیمە و محەمەد دوو ناوی خوازراوی كچ و كوڕەكەن و plus4 له‌چوارچێوەی رەچاوكردنی ئیتیكی رۆژنامەوانی و پیشەيیبوندا ناویان دەپرێزێت و بەشێك لەوردەكاریەكانشی نەخستووەتەڕوو
