PLUS4
پێش 9 مانگ
فەرماندەیی پۆلیسی كەركوك داوا لەهاوڵاتیانی شارەكە دەكات ئەوانەی چەكی بێ مۆڵەتیان لەماڵەوە هەیە، تۆماری بكەن تاوەكو بتوانن بەپێی رێكارە یاساییەكان ببنە خاوەن مۆڵەتی فەرمی و پارێزگاری لێ بكەن.
بەپێی رونكردنەوەیەك كە پۆلیسی كەركوك لەبارەی چۆنێتی تۆماركردنی چەكەكان و دەرهێنانی مۆڵەتەكە بڵاویكردووەتەوە، پێویستە هاوڵاتی لەسەر ماڵپەڕی ( بوابە اور ) هەژمارێكی تایبەت بەخۆی بكاتەوەو دواتر فۆڕمێكی ئەلیكترۆنی پڕبكاتەوە.
بەپێی مەرجەكان كە وەزارەتی ناوخۆ بۆ پێدانی مۆڵەت خستوێتێ روو و پۆلیسی كەركوك بڵاویكردووەتەوە، هەر خێزانێك دەتوانێت دەمانچەیەك یا چەكێكی كڵاشینكۆف و جۆرەكانی تر یا چەكێكی راوكردنی هەبێت.
بەڵام بەو مەرجەی لە 50 فیشەكی دەمانچە و چەك زیاتر لەماڵەكەیدا نەبێت، 200 گولە تاپڕ زیاتریشی نەبێت، واتا مۆڵەتەكە بۆ چەك یا دەمانچەیەكە لەگەڵ تەنها 50 فیشەكدا.
بۆ تۆماركردنی فۆڕمەكەش پێویستت بەم بەڵگەنامەنەیە :
- ناسنامەی باری كەسێتی یا كارتی نیشتیمانی
- جنسییە عێراقی.
- كارتی نیشتەجێبون
دواتر بنكەكانی پۆلیس فۆڕم بەسەر ئەو ماڵ و دووكانانەدا دابەشدەكەن كە فۆڕی ئەلیكترۆنیان پڕكردووەتەوە و پێویستە هاوڵاتی لەماوەی 7 رۆژدا فۆڕمەكە رادەستی بنكەكان بكاتەوە.
بنكەكانی پۆلیسی پسوڵەی تۆماركردنی چەكەكە دەدەن بەو هاوڵاتیەی فۆڕمەكە دەگەڕێنێتەوەو ئەو پسوڵەیە بەشێوەی كاتی و تا دەرچواندنی مۆڵەتی فەرمییەكە، هاوشێوەی مۆڵەتیی هەڵگرتنی چەك بەكاردێت.
هەموو ئەو هاوڵاتیانەی فۆڕمەكان پڕدەكەنەوە پێویستە بەڵێن بدەن بەم شێوەیە:
- پارێزگاری لەچەكەكە دەكەین و رادەستی كەسی تری ناكەین بەپێچەوانەوە ئامادەی رێوشوێنی یاسایین.
- لەكاتی ونكردن و دزرانی چەكەكەدا، لایەنە فەرمییەكان ئاگاداردەكەینەوە.
- لەكاتی گۆڕینی شوێنی نیشتەجێبوندا، بنكەی پۆلیسی خانوی پێشوو ونوێكە ئاگاداردەكەمەوە.
