PLUS4
پێش ساڵێک
درەنگانی شەوی رابردوو، تیمەکانی نەهێشتنی تاوانی ئازادی پۆلیسی کەرکوک لەبۆسەیەکدا توانیان ئەندامانی ئەو باندە دەستگیربکەن کە ماتۆرسکیلەکانیان دەدزی.
سەرچاوەیەک لەپۆلیسی کەرکوک بە plus4 ی راگەیاند: دەستگیرکردنی 3 ئەندامی باندەکە کارێکی سەخت بوو، چونکە دوای ئاشکراکردنیان هەڵاتن و راوەدوونان لەشەقامەکانی کەرکوک رویدا تاوەکو توانرا سەرۆکی باندەکە و دووانی دیکەیان دەستگیربکرێن.
بەوتەی ئەو سەرچاوەیە، دەستگیرکراوەکان دانیان بە دزینی زیاتر لە 16ماتۆرسکیلدا ناوە لەگەڕەکە جیاوازەکانی شارەکە، زۆربەی ماتۆرەکانشیان لەنزیک نەخۆشخانەی ئازادی دزیوە و دواتر لەبازاڕدا فرۆشتوویانە.
پۆلیسی کەرکوک داوا دەکات هەرکەسێک لەماوەی رابردوودا ماتۆرسکیلی دزراوە سەردانی نوسینگەی نەهێشتنی تاوانی ئازادی بکات و داوای یاسایی تۆماربکات تاوەکو ئەنجامدەرانی تاوانەکە نەتوانن دەربازبن.
زۆربەی ئەو تاوانی دزیانەی باندەکە ئەنجامیداوە لەکامێرای چاودێری ماڵان تۆمارکراوە و بەشێکیشی پێشتر پڵەس4 بڵاویکردووەتەوە.
