Plus4
berî 2 saet
وەزارەتی پێشمەرگە: جارێکیتر بەدرۆن هێرشکرایە سەر بارەگایەکی پێشمەرگە
وەزارەتی پێشمەرگە، لەبەیاننامەیەکدا بەتووندی ئیدانەی هێرشكردنە سەر بارەگایەكی هێزەكانی پێشمەرگە لەسنووری قەزای چەمچەماڵ دەكات و هێرشەكەش بەكردەویەكی تێكدەرانە ناوزەند دەکات.
🔸 ڕاگەیاندراوێک لەوەزارەتی پێشمەرگەوە:
شەوی ڕابردوو، جارێکیتر تاقمە تیـ.ـرۆریستییە لەیاسا دەرچووەکان دەستیاندایەوە کردەوەیەکی تێکدەرانەو لەڕێگەی درۆنێکی بۆمبڕێژکراوەوە هێرشیانکردە سەر بارەگایەکی هێزەکانی پێشمەرگە لەسنووری چەمچەماڵ، بەتووندی ئیدانەی ئەم پەلامارە دەکەین کە ئامانج لێی تێکدانی ئاسایش و سەقامگیریی ناوچەکەیە.
دووبارەبوونەوەی ئەم هێرشە تیرۆریستییانە بۆسەر بارەگاکانی پێشمەرگە لەکاتێکدایە کە دۆخی ناوچەکە بەگشتی لەبەردەم قۆناغێکی هەستیار و ئاڵۆزدایە.
جارێکیتر داوا لەفەرماندەی گشتیی هێزە چەکدارەکانی عێراق دەکەین کە سنوورێک بۆ ئەم دەستدرێژییە بێ پاساوانە دابنێت کە دەکرێنە سەر بارەگاکانی پێشمەرگە.
وەزارەتی پێشمەرگە
٢٢ی ئاداری ٢٠٢٦
