plus4
berî 2 saet
ئەمڕۆ ئەنجومەنی وەزیرانی هەرێم بۆ چەندین پرسی گرنگ کۆدەبێتەوە
بڕیارە ئەمڕۆ ئەنجومەنی وەزیرانی هەرێم بۆ چەندین پرسی گرنگ کۆببێتەوە.
بەپێی کارنامەکەی، لەکۆبوونەوەکەدا سێ تەوەری سەرەکی گفتوگۆ دەکرێن:
لەتەوەری یەکەمدا بابەتی سەرژمێریی دانیشتووانی لەساڵی 2024 تاوتوێدەکرێت کە بەپێی ڕاگەیاندراوی فەرمیی سەرژمێرییەکە، ڕێژەی دانیشتووانی هەرێم جگە لە ناوچە کوردستانییەکانی دەرەوەی هەرێم، بەفەرمی بەڕێژەی 14.1% دەستنیشانکرا.
بۆ ئەو مەبەستە ئەنجومەنی وەزیران بەدواداچوون بۆ پابەندکردنی بەغدا بەئەنجامی سەرژمێرییەکە بۆ دەستنیشانکردنی بەشە بوودجەی هەرێم دەکات.
تەوەرى دووەمی کۆبوونەوەکە تایبەتە بەپەسەندکردنی کۆنووسی هاوبەشی نێوان وەزارەتی کاروباری شەهیدان و ئەنفالکراوان و دەزگای زیندانیانی سیاسیی عێراق کە ساڵی ڕابردوو لەنێوان هەردوولا ئیمزاکرا.
تەوەرەکە تایبەتە بەیەکخستن و گواستنەوەی دۆسیەی زیندانیان و گیراوانی سیاسی لەهەرێمەوە بۆ دەزگای ناوبراو.
تەوەرى سێیەم و کۆتاییش بۆ بڕیاردانە لەسەر پێشنیازی وەزارەتەکانی بازرگانی و پیشەسازیی تایبەت بەپارەی بەشە خۆراکی مانگانەی هاووڵاتیان و چارەسەرکردنی پارەی کەڵەکەبووی ساڵانی (2004 تا 2022) لەسەر هەرێم.
