plus4
berî 1 meh
فەرماندەیی هێزەکانی هەسەدە رایگەیاند، سەرەڕای ئەوەی لە کاتژمێر هەشتی ئێوارەی دوێنێوە رێککەوتنی ئاگربەست چووەتە بواری جێبەجێکردنەوە، بەڵام گروپە چەکدارەکانی سەر بە دیمەشق بە چەندین هێرشی جیاواز رێککەوتنەکەیان پێشێل کردووە.
کاتژمێر 08:10ی ئێوارەی دوێنێ: گروپەکانی دیمەشق شارۆچکەی زرگان لە باکووری حەسەکەیان بە تۆپخانەی قورس بۆردومان کرد و بۆردومانەکە زیاتر لە کاتژمێرێکی خایاند.
کاتژمێر 08:20ی ئێوارەی دوێنێ: گروپەکانی دیمەشق هێرشێکیان بە چەکی قورس کردە سەر گوندی تل بارود کە دەکەوێتە سەر رێگای ئەبیەز - ئەبیەز، لە باشووری حەسەکە.
کاتژمێر 11:30ی بەیانی ئەمڕۆ: گروپەکانی دیمەشق هێرشیان کردە سەر هێزەکانمان لە دەوروبەری شاری سڕین، کە تێیدا هێزەکانمان بەرپەرچی هێرشەکەیان دایەوە و پوچەڵیان کردەوە.
کاتژمێر 11:45ی بەیانی ئەمڕۆ: کاروانێکی سەربازیی سەر بە گروپەکانی دیمەشق هێرشیان کردە سەر هێزەکانمان لە گوندی باسل لەسەر رێگای ئەبیەز - ئەبیەز، لە باشووری حەسەکە.
کاتژمێر 02:10ی پاشنیوەڕۆی ئەمڕۆ: گروپەکانی دیمەشق هێرشێکی دووەمیان کردە سەر هێزەکانمان لە دەوروبەری شاری سڕین لە باشووری کۆبانێ، و هێزەکانمان توانییان بەرپەرچی هێرشەکە بدەنەوە.
کاتژمێر 02:45ی پاشنیوەڕۆی ئەمڕۆ: گروپەکانی دیمەشق بە چەکی قورس گوندی حەمدوونی باشووری کۆبانێیان بۆردومان کرد کە بووە هۆی شەهیدبوونی ژنێک.
هەسەدە دووپاتی کردەوە کە ئەوان وەک لایەنێکی پابەند بە ئاگربەست دەمێننەوە و نایانەوێت شەڕ پەرەبسێنێت، بەڵام داوا لە وڵاتانی چاودێر و کۆمەڵگەی نێودەوڵەتی دەکەن کە بێدەنگ نەبن و سنوورێک بۆ ئەم پێشێلکارییانەی دیمەشق دابنێن تاوەکو گیانی هاووڵاتییانی مەدەنی پارێزراو بێت و سەقامگیریی ناوچەکە تێکنەچێت.
