plus4
پێش 3 مانگ
بەرگری شارستانی سوریا لەبەیاننامەیەکدا کۆتایی بەپرۆسەی گەڕان بەدوای زیندانە نهێنییەکان گرتووخانەی سیدنایا هێنا و دەڵێت" هیچ بەش و زیندانێک نەماوە نەکرابێتەوە و بەڵگەش لەسەر بونی ژێر زەوی و ژووری نهێنی نییە.
تەئکیدیش دەکاتەوە، تیمی تایبەتمەند لەگەڵ کەسانی شارەزای گرتووخانەکە هەموو بەش و نهۆمەکان گەڕاون، ناوەو دەرەوەی شوێنەکە و بە هەموو وردەکارییەکانیدا چونەتەوە، بەڵام هیچ بەڵگەیەک لەسەر بونی ژووری نهێنی و ژێر زەمین نییەو شوێنێکیش نەماوە لەوگرتووخانەیەدا ئاشکرا نەکرابێت.
لەپڕۆسەی گەڕانەکەدا 5 تیمی شارەزاو تیمی سەگە پۆلیسییەکانی K9 بەشداربونەو بە شوێن رێڕەوی بۆڕی و وایەر و کامێراکانی چاودێریدا رۆشتوون و ئاوەڕۆکانیش گەڕاون بەبێ ئەوەی شوێنێ نهێنی لەژێر زەوی بدۆزرێتەوە.
بەرگری شارستانی سوریا داوا لەچالاکوانانی تۆڕە کۆمەڵایەتییەکان دەکات، بانگەشەی ناڕاست لەبارەی بەندکراوان و گرتووخانەکان بڵاو نەکەنەوەو هەستی کەسوکاری قوربانیان و بەندکراوان لەبەرچاو بگرن و لەوە زیاتر ئازاریان نەدەن.
داواش دەکات خەڵک بەشێوەی سەربەخۆ دەستوەردان و پرۆسەی چاڵکردن و گەڕان لەگرتووخانەکاندا ئەنجام نەدات چونکە دەبێتە هۆی تێکدانی بەڵگەکان کە مانەوەیان دەبنە گەواهیدەر و بنەمای چەسپاندنی دادپەروەری و لێپرسینەوە لەکەسانی تۆمەتبار.
