ئاژانسی هەواڵی plus4
پێش ٢ کاتژمێر
جەبهەی توركمانی لەراگەیاندراوێكدا داوا دەكات عەمید فەتاح خەفاجی فەرماندەی پۆلیسی كەركوك لەپۆستەكەی دووربخرێتەوەو كەسێكی بەتوانا بۆ بەڕێوەبەردنی دۆسییەی ئەمنی پارێزگاكە دابنرێت.
جەبهەی توركمان لەراگەیەندراوەكەیدا هێرش دەكاتە سەر فەرماندەی پۆلیسی كەركوك و دەڵێت: لەدوای دەستبەكاربونی وەك فەرماندەی پۆلیس، سیاسەتی پەراوێزخستنی لەدژ پێكهاتەی توركمانی گرتووەتەبەر و پۆستەكانی پۆلیس كە پشكی توركمانن بە پێكهاتەكانی تر دەدات.
لەدوای دەستگیركردنی عەمید مستەفا نەوزاد بەڕێوەبەری بازگەكانی كەركوك، ئەمە دووەم راگەیاندراوی جەبهەی توركمانییە لەدژی فەرماندەی پۆلیس و لەیەكەم راگەیاندراودا داوای لێكۆڵینەوەی لەگەڵ كرا و ئێستاش داوای دوورخستنەوەی دەكەن.
توڕەبونی جەبهەی توركمانی بەهۆی پێدانی پۆستی بەڕێوەبەری بازگەكانە بە عەقید لوئەی بەیاتی لەپێكهاتەی عەرەب، لەكاتێكدا توركمان عەقید ئەركان ئەكرەمی بۆ شوێنگرەوەی ئەفسەرە دەستگیركراوەكەیان، دیاریكردبوو.
ئاژانسی هەواڵی plus4 وەك یەكەم دەزگای میدیایی هەواڵی دانانی عەقید لوئەی لەپۆستی بەڕێوەبەری بازگەكان بڵاوكردەوەو لەراپۆرتەكەدا پێشبینی كاردانەوەی جەبهەی توركمانیشی كردبوو.
- لینكی راپۆرتەكەی plus4 لەسەر دانانی ئەفسەرێكی عەرەب وەك شوێنگرەوەی ئەفسەرە دەستگیركراوەكەی توركمان
https://www.facebook.com/plus4.news/videos/1958495354648344/
